Սամվել Անուշավանի Խաչատրյան. սիրած գործի նվիրյալը

Սամվել Անուշավանի Խաչատրյան. ով թեկուզ մեկ անգամ գործ է ունեցել բժշկական տեխնոլոգիաների և տեխնիկայի հետ, կճանաչի այդ ոլորտում բացառիկ գիտելիքներ և փորձառություն ունեցող, կյանքի 32 տարիները սիրած գործին նվիրաբերած մարդուն: Նա ճանաչված մասնագետ է ոչ միայն մեր հանրապետությունում, այլև նրա սահմաններից դուրս: 

Դեռևս Երևանի պետական համալսարանի ռադիոֆիզիկայի ֆակուլտետում ուսանելու տարիներին տարվեց մագնիսական ռեզոնանսի ուսումնասիրմամբ: Այդ թեմայով գերազանցությամբ պաշտպանեց դիպլոմային աշխատանքը: Նրա անմիջական մասնակցությամբ Հայաստանում շահագործման հանձնվեց առաջին մագնիսառեզոնանսային տոմոգրաֆը: 

Աշխատանքային գործունեությունը սկսեց «Աստրո» hատուկ կոնստրուկտորական բյուրոյում, որտեղ նրա գիտական առաջին թեման վերաբերում էր ռենտգենյան աստղադիտակին: Այնուհետև կենտրոնական կոնստորկտորական տեխնիկանան բյուրոյի լենինգրադյան մասնաճյուղում զբաղվեց արտադրական պրոցեսների ու արտադրանքի հուսալիության ապահովման և ավտոմատ կառավարման համակարգերի ստեղծման հարցերով` կարճ ժամանակում ավագ ինժեներից հասնելով բաժնի վարիչի պաշտոնի:

1979-ին հրավիրվեց «Սոյուզմեդմոնտաժնալադկա» միութենական վարչության Երևանի բաժանմունք, սկզբում աշխատեց որպես պետի տեղակալ, ապա` գլխավոր ինժեներ: Բաժանմունքն ապահովում էր արտասահմանյան արտադրության բժշկական նորագույն տեխնիկայի ներդրումը ԽՍՀՄ տարբեր հանրապետություններում: 1988-ին ԽՍՀՄ առողջապահության նախարարության կողմից գործուղվեց Աֆղանստան` որպես բուժտեխնիկայի գծով գլխավոր ինժեներ, կատարած լավագույն աշխատանքի համար արժանանալով «От благодарного афганского народа» մեդալի: Հայաստան վերադարձավ երկրաշարժից անմիջապես հետո և իր գործընկերների հետ արեց ամեն ինչ, որպեսզի աշխարհի բազմաթիվ երկրներից ստացված բուժտեխնիկան ծառայի իր նպատակին: 

Արցախում զինադադար հայտարարվելուց անմիջապես հետո մի խումբ բժիշկներ և ինժեներներ Ս. Խաչատրյանի գլխավորությամբ մեկնեցին Ստեփանակերտ` բուժտեխնիկայի վերականգնման աշխատանքները կազմակերպելու համար: Այդ գործընթացը շարունակվում է մինչև օրս: Ս. Խաչատրյանը ԼՂՀ առողջապահության համակարգում ներդրած ավադնի և մատուցած ծառայությունների համար ԼՂՀ վարչապետի կողմից 2010թ. պարգևատրվել է հուշամեդալով: 

1998 թվականին նրա նախաձեռնությամբ և ակտիվ ջանքերի շնորհիվ ստեղծվեց «Մեդիտեք» սահմանափակ պատասխանատվությամբ ընկերությունը, որի գործունեության նպատակը մեր հանրապետություն բժշկական նորագույն սարքավորումներ և տեխնիկա ներկրելն ու տեղադրելն է, նորոգելն ու սպասարկելը, ինչպես նաև այդ սարքավորումների վերաբերյալ բժշկական խորհրդատվություն տարածելը:

Իր գործի նվիրյալ, եռանդուն կազմակերպիչ, նախաձեռնող, դժվարություններից չընկրկող, մարդկային հմայքով օժտված, անկոտրում կամքի տեր Սամվել Խաչատրյան հոր կերպարը օրինակ է որդու` Անուշավանի համար, ով այսօր էլ հոր ղեկավարությամբ ՙՄեդիտեքում՚ աշխատող իր ընտանիքի բոլոր անդամների հետ շարունակում է պրպտումները նոր, առաջավոր բժշկական տեխնիկան պրակտիկայում ներդնելու ուղղությամբ:

«Առողջապահություն» հանդեսի խմբագրությունը շնորհավորում է մեր գործընկեր ու լավ բարեկամ, իր գործի նվիրյալ և գերազանց գիտակ, հաջողակ գործարար Սամվել Անուշավանի Խաչատրյանին` ծննդյան 65-ամյակի կապակցությամբ, ցանկանում քաջառողջություն, հաջողություններ և աշխատանքային բեղմնավոր գործունեություն:

Հարցեր, պատասխաններ, մեկնաբանություններ